koi faryaad teray dil main dabi ho jaisay
tu nay aankhon say koi baat kahi ho jaisay

jagtay jagtay ik umer kati ho jaisay
jaan baqi hay magar sans ruki ho jaisay

her mulaqaat peh mehsoos yehi hota hay
mujh say kuch teri nazar pooch rahi ho jaisay

raah chaltay howay akser yeh gumaan hota hay
woh nazar chup kay mujhay dekh rahi ho jaisay

aik lamhay main simut aaya sadion ka safar
zindagi tez buhut tez chali ho jaisay

is tarah pehron tujhay sochta rehta hoon main
meri her saans teray naam likhi ho jaisay