Hum ghoom chukay basti bun main
Ik aas ki phaans liyay mun main
Koi sajan ho koi piyara ho
Koi deepak ho koi tara ho
Jab jeevan raat andhairee ho
aik baar kaho tum meri ho

Jab sawan badal chaaye hoon
Jab phagan phool khilaaye hoon
Jab chanda roop lutata ho
Jab sooraj dhoop nahata ho
Ya shaam nay bastee ghairee ho
Aik baar kaho tum meri ho

Haan dil ka daman phaila hai
Kiyun goree ka dil maila hai
Hum kab tak peet kay dhokay main
Tum kab tak door jharokay main
Kab deed say dil ko sairee ho
Aik baar kaho tum meri ho

Kiya jhagra sood khasaray ka
Yeh kaaj naheen banjaray ka
Sab sona ropa lay jaaye
Sab duniya, duniya lay jaaye
Tum aik mujhay buhtairee ho
Aik baar kaho tum meri ho