Gar mujhay is ka yaqeen ho
meray humdum, meray dost
Gar mujhay is ka yaqeen ho
kay teray dil ki thakan
Teri aankhon ki udaasi,
teray seenay ki jalan
Meri diljoi,
meray piyar say mit jaye gi
Gar mera harf-e-tasalli
woh dawa ho jis say
Ji uthay phir tera ujra hua benoor dimagh
Teri peshaani say dhul jayain
yeh tazleel kay daagh
Teri beemar jawani ko shifa hojaye
Gar mujhay is ka yaqeen ho
meray humdum, meray dost
Roaz-o-shab,
shaam-o-sehar
main tujhay behlata rahun
Main tujhay geet sunata rahun
halkay, sheereen
Aabshaaron kay,
baharon kay,
chaman zaaron kay geet
Aamad-e-subh kay,
mehtaab kay,
sayyiaron kay geet
Tujh say main husn-o-mohabbat ki hikayaat kahun...
Kesay maghroor haseenaon kay barfaab say jism
Garm haathon ki hararat mai pighal jatay hain
Kesay aik chehray kay thehray hue maanoos nuqoosh
Dekhtay dekhtay yaklakht badal jatay hain
Kis tarah aariz-e-mehboob ka shaffaf bilour
Yak bayak baada-e-ehmar say dehak jata hai
Kesay gulcheen kay liye jhukti hai khud shaakh-e-gulab
Kis tarah raat ka aiwaan mehak jata hai
Yunhi gata rahun, gata rahun teri khaatir
Geet bunta rahun, betha rahun teri khatir
Per meray geet teray dukh ka mudaawa hi nahi
Naghma jarraah nahi, monis-o-ghamkhuwaar sahi
Geet nashtar to nahi, marham-e-azaar sahi
Teray azaar ka chaara nahi, nashtar kay siwa
Aur yeh saffak maseeha meray qabzay mai nahi
Is jahaan kay kisi zirooh kay qabzay mai nahi
Haan magar teray siwa,
teray siwa,
teray siwa!
No comments:
Post a Comment